Psa 5 | YomNWM | STEP | Nkunga Davidi kuidi pfumu minyimbidi. Wuyimbidila wawu mu flute. A Yave, tamba dikutu mu mambu mama ayi tala vumina kuama.

Psalms 5

Wuthuadisa mu nzilꞌaku

Nkunga Davidi kuidi pfumu minyimbidi. Wuyimbidila wawu mu flute.

1 A Yave, tamba dikutu mu mambu mama ayi tala vumina kuama.
2 Dimba yamikina kuama bu ndilembo tombi lusadusu
A ntinu ama ayi Nzambi ama
bila ngeyo ndieti sambila.
3 A Yave, mu nsuka ngeyo weti wa mbembo ama.
Mu nsuka ndieti tula zindombolo ziama va ntualꞌaku
ayi ndieti vingila mvutu mu diana.
4 Bila ngeyo wisiko Nzambi wummonanga khini mu mambu mambimbi ;
mutu wumbimbi kalendi vuanda ko va kimosi ayi ngeyo.
5 Batu badi luniemo balendi telama ko va meso maku.
Ngeyo weti lenda batu boso bobo bamvanganga mambimbi.
6 Ngeyo wumbunganga batu bantubanga luvunu.
Batu bobo bantengulanga menga ayi bobo bamvunanga,
Yave weti kuba kakumukina.
7 Vayi minu ndiela kota mu nzoꞌaku mu diambu di kiadi kiaku kinneni
ndiela buongama mu lukinzu mu Nzoꞌaku Nzambi Yinlongo.
8 Wuthuadisa, a Yave mu busonga buaku
mu diambu di bambeni ziama.
Ludika nzilꞌaku ku ntualꞌama.
9 Bila kuisi ko mambu malenda siwulu diana mu miunu miawu ;
mu mintima miawu muwedi mambu mambivisanga.
Phovilakꞌawu yidi ziami kizibuka
ayi mu ludimi luawu bantubilanga luvunu.
10 Wuba monisa ti mu nzimbala badi, a Nzambi.
Bika mayindu mambimbi mawu ma babuisa.
Wuba kuki mu diambu di wombo di masumu mawu
Bila ngeyo bafuemini.
11 Vayi bika babo bantomba suamunu mu ngeyo bamona khini.
Wuba bika bayimbila mu khini mu zithangu zioso ayi bika wuba keba.
Muingi bobo beti zola dizina diaku,
bamona khini mu ngeyo.
12 Bila bukiedika ngeyo Yave wunsakumunanga mutu wusonga ;
Wubazungidila mu mamboti maku banga nkaku.